不專業足球筆記（八十八）︰港隊消息︰東盟盃終於塵埃落定　亞運港隊女足歷史性射破中國大門；至尊沙田防線亮紅燈 反負九龍城響護級警號 | 不專業講足球 | 球迷世界

不專業足球筆記（八十八）：港隊消息：東盟盃終於塵埃落定 亞運港隊女足歷史性射破中國大門；至尊沙田防線亮紅燈 反負九龍城響護級警號。入正題之前，首先想呻下屌下鬼…Puma推出果件復刻版11號印字果件衫我抽唔中啊…之後諗住等普通版，入到手都叫唔錯喇，點知據聞當日香港時間十二點開賣唔夠一分鐘已經賣晒無貨(唔知有冇誇大喇)…我仲遲咗成個鐘先入去Puma個網站，唔駛問梗係買唔到喇…復刻版買唔到我預咗，但普通版竟然一分鐘搶晒，有冇咁癲啊…好喇，入正題，今個星期先從香港隊開始吧。對上幾個星期，球圈同埋網上唔少港足新聞媒體、social media都盛傳由定咗由香港主辦既東盟盃流產，連FIFA官方賽程都唔見埋，甚至連9月份既香港代表隊名單，足總官方都唔係講明係用於「東盟盃」賽事，反而只係含糊地寫上「9 月至 10 月國際賽期集訓」。好彩9月10號果日，足總官宣確認主辦首屆國際足協東盟盃 (D2組)，但奇怪既係，到執筆既時候，足總依然未宣布門票發售安排詳情。適齡球員去踢亞運梗係好啲，畢竟大港腳要搵人替代佢哋都易啲，而且我都好希望香港可以突破上屆四強既歷史性佳績。講起亞運，女子組既賽事已經開始咗，香港以1比5不敵中國，但係張煒琪呢位四朝元老既入波，係香港女足歷史上面第一次射破中國既大門（同男足唔同，女足亞運係計國際A級賽），真勁揪！呢下入波有少少幸運成份，中國個中堅頂波失誤，個龍門又唔知做乜衝到出禁區外，比張煒琪用頭一點推過射入空門。其實睇精華，兼且睇數據中國全場射門多達36次，港隊基本上大部分時間都係捱打，如果中國自己把握得好同埋港隊門將李思瑩救咗幾球，應該唔止輸咁少。但又咁講，本身我哋同中國既實力真係差得遠，5比1 呢個比數都算係咁。講返今週港超，篇幅有限，想講下至尊沙田對和富九龍城先。今次係第二次睇至尊比賽直播（不過時差關係只係睇到半場），佢哋攻力喺同級球隊黎講應該算係唔大問題，占士、龜谷幾惹人好感，仲有一班過氣港超腳都交到貨，最大問題反而係佢哋條防線，好似豆腐渣工程咁。馬利安奴、安沙好似喺友誼league度求其執返黎咁，上季安沙踢流浪，但好老實我都冇印象佢喺流浪特別出眾，今季踢咗幾場，佢好似場場出黎學踢波咁。當日既隊長鄭進泓一樣恐怖，第一個失波肉酸，直頭係學界級錯誤，下半場由得個波漏出去諗住唔追波，點知個波就真係比角球旗頂住冇出界。上一集傾過何文輝究竟值唔值得一個外援位，當時我既意見雖然有保留，但我覺得睇咗頭三場，佢都算OK穩，唔知係咪我燈咗佢，佢今場第二、三球都關佢事，即使佢今場都不乏一啲精采撲救，但呢兩下失誤就真係功不抵過，令球隊由贏變輸。但瀨晒何文輝都唔公平，第一球同第三球，點解條防線一踢就穿？我覺得王老闆與其掟錢簽中場，不如執靚仔條防線先，中堅真係要搵個勁既，而龍門可以照搵外援，不過要搵就搵個好啲既，何文輝唔係陳達燊級數，值唔值得外援位見仁見智。有師兄提過艾力司，如果條友叫價唔係叫5皮都考慮得過，但佢既身手，其實都真係好麻麻，你有香港護照唔等於值得一個外援人工。輸咗呢場護級六分波，至尊沙田都幾大鑊。Gimmick固然重要，但足球比賽最緊要係成績，再咁踢落去，未必留得住啲新客。另外，喺第一週對南區時我都已經覺得港會好有驚喜，今場佢哋仲要揮低大埔，睇黎港會今季應該唔會做護級分子…又睇下我會唔會唔覺意燈咗佢，哈哈。#不專業足球筆記 #專欄 #足球專欄 #足球 #港超 #至尊沙田 #至尊 #和富九龍城 #香港隊 #。廣告時間 – ig: leafopen3instagram.com/leafopen3fb: leafopenleafopenfacebook.com/leafopenleafopen thread: @leafopen3www.threads.com/@leafopen3更多專欄內容︰ https://www.leafopenleafopen.com/unprofessional9up更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio個人網站︰ https://www.leafopenleafopen.com/如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938。 想知得更多詳情？立即Click這裡


本文章由Open AI人工智能編寫，僅屬學術用途。
可參考相關同類新聞